Atmosfera në darkën shtetërore të organizuar në kështjellën e Windsor me rastin e vizitës zyrtare të presidentit francez Emmanuel Macron dhe bashkëshortes së tij Brigitte në Mbretërinë e Bashkuar u dallua për një frymë miqësore dhe të çliruar, ndryshe nga formaliteti tradicional që shoqëron zakonisht ngjarje të këtij niveli.
Një moment i veçantë, që nuk kaloi pa u vënë re nga të pranishmit dhe mediat, ishte një gjest i papritur nga presidenti francez: ai i shkeli syrin princeshës së Uellsit, Kate Middleton, gjatë darkës formale. Edhe pse i vogël dhe i interpretuar si miqësor, ky veprim ishte i pazakontë për protokollin rigoroz të pallatit mbretëror. Middleton, si gjithmonë, u duk se e ruajti qetësinë dhe përmbajtjen e saj të zakonshme, edhe pse fytyra e saj nuk u kap qartë në fotot zyrtare që dokumentonin momentin.
Kjo nuk ishte hera e vetme kur Macron theu protokollin. Më herët gjatë ditës, në pritjen e çiftit presidencial francez në aeroportin RAF Northolt, ai i puthi dorën Kate Middleton – një gjest që etiketa mbretërore zakonisht nuk e lejon në ambiente publike. Ai veproi njësoj edhe me mbretëreshën Camilla, duke nxitur një reagim të ngjashëm nga mbreti Charles III, i cili përshëndeti Brigitte Macron me të njëjtën mirësjellje.
Këto ndërveprime të ngrohta dhe spontane janë parë nga analistët si një shenjë e stilit më të butë dhe bashkëkohor të familjes mbretërore nën drejtimin e mbretit Charles III. Për më tepër, edhe vetë Kate dhe Princi William u panë të kapur dorë për dore gjatë pritjes, një gjest i rrallë për çiftin mbretëror që për vite me radhë ka ndjekur një etikë më të përmbajtur në paraqitjet publike.
Vizita e Macron-it në Britani shënoi jo vetëm forcimin e lidhjeve diplomatike mes dy vendeve, por gjithashtu tregoi një fytyrë më njerëzore të diplomacisë së nivelit të lartë – një që e lejon buzëqeshjen, një shikim miqësor dhe një puthje të beftë dore.
