Pas një periudhe reflektimi dhe emocionesh të forta, Dafina Zeqiri është rikthyer në rrjete sociale për të ndarë me ndjekësit e saj ndjesitë e para si nënë. Këngëtarja shqiptare, e cila pak ditë më parë solli në jetë djalin e saj, Daskan, ka ndarë një mesazh të ndjerë ku përshkruan ndryshimin e madh që ka përjetuar.
“Faleminderit prej zemrës,” shkruan Dafina, duke falënderuar të gjithë ata që kanë uruar dhe e kanë përkrahur në këtë kapitull të ri. “Ju falenderoj krejt juve per dashnine e madhe e mireseardhjen qe ia keni bo djalit tone Daskan Gjergji n’kete bote.
Me u bo nane osht si me bo update n’krejt jeten shpirt, trup, zemer, karriere… gjithçka ndjehet ma ndryshe, ma thelle. Jam super e emocionume per gjithçka që po vjen.”
Në këtë rrëfim të sinqertë, ajo i jep vend të veçantë nënave dhe sakrificave të tyre, duke i cilësuar si “superheroina e kësaj bote”, ndërsa nuk harron as baballarët, që sipas saj “qendrojne para grave te tyne, si mbeshtetja ma e madhe”.
Duke folur për partnerin e saj, Kreshnik Gjergji, Dafina shpreh një ndjenjë të thellë mirënjohjeje: “Burrit tem, faleminderit qe je shkembi jem. E di qe ki me qene shembulli ma i mire per djalin tone. Ju du krejtve shume. Le ta nisim kete kapitull te ri bashke.”
