Në një botë ku dashuria shpesh lidhet me rininë dhe pamjen, aktori legjendar Liam Neeson dëshmon të kundërtën. Në moshën 73-vjeçare, ylli i Hollywood-it duket se është kapluar nga ndjenjat për bashkë-aktoren e tij të fundit, Pamela Anderson, 58 vjeçe.
Duke folur për projektin më të ri filmik, një ribërje e komedisë klasike “The Naked Gun”, Neeson nuk kurseu fjalët kur u pyet për bashkëpunimin me Andersonin:
“Jam çmendurisht i dashuruar me të. Është thjesht fantastike të punosh me të. Nuk mund ta komplimentoj mjaftueshëm, do të jem i sinqertë me ty.”
Neeson do të rikthehet në rolin e ikonikut Frank Drebin, dikur luajtur nga Leslie Nielsen, ndërsa Pamela Anderson do të jetë partnerja e tij në film – një figurë e frymëzuar nga personazhi joshës i Priscilla Presley-t.
Por ndërsa fansat presin me padurim projektin, janë komentet e ndërsjella dhe shprehjet e ndjenjave jashtë kamerave që kanë ndezur rrjetin. Anderson, e cila prej vitit 2022 është sërish beqare pas ndarjes nga burri i saj i pestë, nuk hezitoi ta përshkruajë Neesonin si një njeri të veçantë:
“Ai nxjerr në pah më të mirën tek ti… me respekt, mirësi dhe përvojë të thellë. Ishte një nder absolut të punoja me të,” tha ajo.
“Ai kujdesej sinqerisht për mua – më mbështolli pallton rreth meje kur kisha ftohtë.”
Neeson, nga ana e tij, nuk harroi të theksojë profesionalizmin e aktores:
“Pa ego të madhe. Ajo thjesht vjen për të bërë punën. Ajo është qesharake dhe shumë e lehtë për të punuar me të. Do të jetë fantastike në film.”
Ndërsa përshkrimi më i ndjerë nga Pamela ishte ky:
“Mendoj se kam një mik të përjetshëm, Liamin, dhe padyshim që kemi një lidhje shumë të sinqertë, shumë të dashur, dhe ai është një djalë i mirë. Ai është vërtet një djalë qesharak. Ndonjëherë sillet si një djalë i vogël.”
Duket se për çiftin simpatik, dashuria ka ardhur pikërisht kur nuk e prisnin më — dhe ndoshta, pikërisht atëherë kur ishte më e sinqerta.
