Klajdi Musabelliu ka vendosur të tregojë të vërtetën pas batutave të shumta që kanë qarkulluar për një bashkëpunim mes tij dhe Elvana Gjatës. Në një intervistë për emisionin “Pushime On Top” me Eni Shehun, këngëtari i njohur sqaroi se ndonëse gjithçka nisi si një shaka në “Big Brother VIP 4”, dëshira për të bashkëpunuar me Elvanën është shumë reale.
“Më ka marrë shumë herë në telefon, por nuk kam patur kohë se kam qenë shumë shumë i zënë me këto bashkëpunimet që kam patur”, tha ai me humor, duke shtuar se për momentin është ende në pushime dhe koha nuk është në favorin e tij.
Musabelliu nuk nguroi të shprehë publikisht simpatinë e tij për artisten:
“Sigurisht që çdokujt do t’i pëlqente një bashkëpunim me Elvanën. Unë po të isha Elvana do kisha pranuar se jam djalë i mirë, këngëtar i mirë.”
Ndërsa kujton një nga momentet më të rëndësishme të karrierës, ai ndan edhe një fakt nga e kaluara:
“Së bashku me Elvanën në vitin 2003 kemi performuar për herë të parë publikisht në skenën e Teatrit Kombëtar të Operas dhe Baletit.”
I pyetur nëse kanë folur personalisht për këtë ide, Klajdi shpjegon se gjithçka nisi falë një batute brenda shtëpisë së BBVIP, për shkak të ngjashmërisë që kishte një banore tjetër me Elvanën:
“Jo, nuk e kam kontaktuar direkt. E nisa si shaka këtë gjë edhe në ‘Big Brother’ falë Loredanës, nga ngjashmëria. E ajo ma rindezi dhe riktheu atë Elvanën, atë dashurinë artistike që kam për të.”
Por mesa duket, shaka nuk ka mbetur më. Klajdi i dërgon një mesazh të drejtëpërdrejtë këngëtares:
“O Elvana po hajde ta bëjmë atë bashkëpunim se na çmende. Po boll tani se plasa.”
A do të kemi më në fund një duet të shumëpritur? Me këtë ritëm, topi është në fushën e Elvanës.
