Festivali i Këngës në RTSH, ngjarja më e madhe e muzikës shqiptare, ka çelur edicionin e tij të 64-t. Me publikimin e spotit promovues, është hapur thirrja për këngëtarë, kompozitorë dhe autorë nga e gjithë Shqipëria, Kosova, Maqedonia e Veriut dhe diaspora.
Në spotin e realizuar në një sfond të mrekullueshëm detar, shfaqet Elhaida Dani, këtë vit në rolin e Drejtoreshës Artistike. Me një paraqitje plot elegancë pranë një pianoje të bardhë, ajo u bën thirrje artistëve të afirmuar dhe talenteve të reja të sjellin krijimet e tyre për të qenë pjesë e këtij edicioni, i cili premton emocione të reja dhe këngë që do t’i shtohen historisë së festivalit.
Ky event, që prej vitit 1962 ka nxjerrë në pah emrat më të njohur të muzikës shqiptare, është gjithashtu porta drejt Eurovisionit, ku fituesi përfaqëson Shqipërinë. Edicioni i kaluar u fitua nga “Shkodra Elektronike” me këngën “Zjerm”, e cila renditi Shqipërinë në vendin e tetë në Eurovision 2024.
Regjia e spotit mban firmën e Redi Trenit, duke sjellë një atmosferë moderne dhe plot energji për një festival që synon të thyejë pritshmëritë.
Audicionet do të zhvillohen nga 1 deri më 30 shtator – një mundësi unike për çdo artist që dëshiron të ngjitet në skenën më prestigjioze të muzikës shqiptare.
