Me vizitën e dytë shtetërore të Donald Trump në Britani të planifikuar për mesin e shtatorit, vëmendja e publikut nuk është vetëm te presidenti, por edhe te Zonja e Parë. Zyrtarë britanikë besojnë se Melania ka fituar një rol kyç në prapaskenë, duke ndikuar në mënyrë të dukshme politikën e jashtme të Shteteve të Bashkuara.
Që nga fillimi i mandatit të tij të dytë, kur Trump ka bërë kthesa të mëdha në çdo front ndërkombëtar, diplomatët britanikë kanë ndryshuar strategji: në vend të përpjekjes për ta frenuar vetë presidentin, ata po përqendrojnë qasjen te gruaja e tij. Vizita e fundit e çiftit në Britani, për një fundjavë golfi, vetëm sa e ka forcuar idenë se Melania është këshilltarja e tij më e besuar.
Burime pranë Shtëpisë së Bardhë pohojnë se ajo ka ndikuar në ndryshimin e qëndrimit të presidentit për krizën humanitare në Gaza, si dhe në skepticizmin e tij ndaj premtimeve të Vladimir Putinit për paqe në Ukrainë. “Në biseda private, Trump i referohet pikëpamjeve të saj me respekt,” thonë ata, duke shtuar se presidenti shpesh e pranon publikisht ndikimin e saj.
E njohur për profilin e saj diskret dhe shmangien e deklaratave politike, Melania ka kaluar më shumë kohë në Nju Jork pranë djalit të saj, sesa në Shtëpinë e Bardhë. Megjithatë, autobiografia e saj “Melania”, edhe pse e përshkruar si sipërfaqësore nga kritikët, tregon për angazhimin e saj në çështje humanitare, mbrojtjen e fëmijëve dhe të drejtën për abort – një qëndrim që shpesh e ka vendosur në pozita të kundërta me bashkëshortin.
Në një sondazh të shkurtit 2025, ajo renditej e 10-ta për nga ndikimi brenda administratës. Por largimi i figurave të tjera nga rrethi i ngushtë i Trump, si Elon Musk, ka rritur peshën e saj politike si një zë që presidenti dëgjon me kujdes.
