Rrjetet sociale shpërthyen nga komentet kur Georgina Rodriguez shfaqi unazën marramendëse që Cristiano Ronaldo i dha për të zyrtarizuar lidhjen e tyre. Dizajnuar nga kompania e njohur spanjolle Dámaso Martínez, bizhuteria u konsiderua nga fansat si një kryevepër e vërtetë. Por a është me të vërtetë kjo unazë ajo që quhet klasikisht “e fejesës”?
Ekspertët kanë një tjetër mendim. Juana García Sánchez, një emër i njohur në botën e bizhuterive, ka habitur publikun me deklaratën e saj:
“Unaza që CR7 i dha gruas së tij të ardhshme nuk është një unazë e vërtetë fejese, por më tepër një unazë kokteji.”
Sipas saj, dizajni nuk i plotëson kriteret tradicionale të një unaze fejesash:
“Sepse është e madhe dhe e rëndë. Ky lloj guri, rreth 40 karat, është më i përshtatshëm për një gjerdan sesa për një unazë. Është e pakëndshme dhe kufizon gishtat. Vetëm vendosja është perfekte, por gjithçka tjetër mungon.”
Në fakt, ekspertja shkon më tej, duke e përshkruar atë si një unazë të krijuar për t’u mbajtur në evente madhështore, por jo në përditshmëri:
“Ajo unazë është më shumë një unazë formale ose për koktej, e projektuar për të tërhequr vëmendjen në raste të veçanta, por jo për të simbolizuar një angazhim që e mbani çdo ditë.”
Unazat kokteji si ajo e Georginës kanë histori të gjatë – ato lindën në vitet 1920, gjatë Prohibicionit në SHBA, kur gratë i përdornin për të treguar pavarësi dhe stil personal. Ato janë gjithmonë të mëdha, të guximshme dhe të dizajnuara për të tërhequr sytë në festa.
Ndërkohë, unaza e fejesës duhet të jetë praktike, e rehatshme, prej ari të verdhë ose të bardhë, dhe të lejojë lëvizjen e gishtave. Mbi të gjitha, ajo duhet të mbartë simbolikën e dashurisë dhe besnikërisë së përditshme.
Pra, ndonëse unaza e Georginës ka bërë bujë dhe ka lënë pa fjalë miliona ndjekës, ekspertët insistojnë: nuk është një unazë fejesash… por një deklaratë stili!
