Manjola Nallbani: Nuk konkurroj dot me portretet e shformuara që bëjnë pis emrin “artist”

Sipas saj është tepruar shumë! Këtë mendim ka Manjola Nallbani për muzikën shqiptare në ditët e sotme. Përmes një statusi të gjatë në “Facebook” ajo ka falenderuar bashkëpunëtorët e saj për këngën “Vetëm unë”. Më tej me ironi artistja ka folur për “koleget” që bëjnë sot muzikë shqiptare me të cilat ylli i skenës nuk konkurron dot. “’Vetëm unë’, my favourite song (kënga ime e preferuar). Faleminderit Flori Mumajesi për këtë krijim, Enada At Nikolla per veshjen, Kozeta Bakiu për koreografinë! Jam koshiente, që nuk është këngë për çdo publik e shije, sidomos në ditët e sotme e në tregun e sotëm muzikor! Aq më pak me kriteret që duhet të ketë një këngë për t’u klikuar! Shpesh për klikime as Lara Fabian nuk konkurron dot me fenomene shqiptare me pseudonime në vend të emrit, apo portrete të shformuar që e bëjnë kaq pis emrin artist apo këngëtar e që vetëm me këtë fjalë s’kanë lidhje! Për më tepër na rrotullohen në çdo emision, që qëllim kryesor ka të mbledhë para e shikueshmëri, duke shfrytëzuar kuriozitetin e sëmurë të një kategorie njerëzish që s’u ngop akoma me vulgaritet ekstrem! Çfarë më dhëmb mua në gjithë këtë? Çfarë po i ushqehen si shembuj suksesi fëmijëve tanë, dhe a do ju pëlqente që t’ju rriteshin fëmijët e tyre me këtë frymë. Ç’pata unë, mund të thotë dikush?! Po sikur u teprua shumë e po na vjen kaq keq për diplomat që morëm sa t’i grisësh fare”, ka shkruar Nallbani.