Këtë javë ka nisur në Kaliforni procesi gjyqësor kundër reperes së njohur Cardi B, e paditur nga ish-roja e sigurisë Emani Ellis për një incident të ndodhur në vitin 2018, gjatë një vizite gjinekologjike të artistes.
Ellis pretendon se Cardi e kishte sulmuar fizikisht, e kishte sharë dhe fyer me gjuhë racore, duke i shkaktuar edhe dëmtime që, sipas saj, kanë kërkuar ndërhyrje mjekësore. Për këtë ajo kërkon 24 milionë dollarë dëmshpërblim.
Reperja, e cila në atë periudhë ishte shtatzënë, i ka mohuar akuzat për dhunë fizike, duke pranuar vetëm një përplasje verbale. “Nuk e preka. Thjesht i fola”, u shpreh Cardi gjatë dëshmisë, duke theksuar se ishte ndjerë e bezdisur pasi po ndiqej dhe filmohej nga rojet.
Seancat u bënë virale në rrjete sociale për shkak të reagimeve të saj të drejtpërdrejta. Një nga momentet më të përfolura ishte kur Cardi pranoi se kishte përdorur ofendime, por saktësoi: “Nuk e quajta të shëndoshë, e quajta kuçkë”, duke shkaktuar të qeshura në sallë.
Tonet në sallën e gjyqit u tensionuan kur avokati i palës paditëse e pyeti për flokët e saj dhe insinuoi lidhje të mundshme me banda. Reperja reagoi e irrituar, duke i thënë: “Hap sytë”. Ajo mohoi gjithashtu të ketë përdorur ndonjë shprehje racore, duke u vetëidentifikuar si afro-karibiane.
Përveç dëshmive, edhe paraqitja e Cardi-t ka tërhequr vëmendje online: një nga paruket e saj u krahasua me stilin e Kris Jenner dhe u kthye menjëherë në meme të shpërndara gjerësisht.
Procesi pritet të zgjasë edhe disa ditë, ndërsa në internet është shndërruar në një spektakël komentesh dhe batutash.
