Flori Mumajesi, prej një kohe të gjatë ka qenë i tërhequr nga skena muzikore dhe projektet e reja. Edhe në rrjetet sociale, ku dikur ishte mjaft aktiv, postimet e tij janë bërë të rralla. Por së fundmi, një “Instastory” i Florit ka tërhequr menjëherë vëmendjen e ndjekësve.
Në postim, ai ka ndarë një audio enigmatike ku dëgjohet zëri i këngëtares Elvana Gjata, e cila thotë: “A do t’a heqësh qafe si njeri apo e do… thuaj të drejtën tani”. Më pas, një zë tjetër i përgjigjet shkurt: “Se di”.
Audioja vazhdon me një pjesë të njohur nga kënga e Florit “Pa jetë”, ku dëgjohet: “Si mund të t’dojë dikush ty nuk e di, kur ti e hedh në plehra atë dashuri”. Ndërkohë, një tjetër zë shton: “Historinë nuk e bën dot vetë”.
Fragmenti përmbyllet me një kor fëmijësh që interpretojnë vargun e njohur të artistit: “Për mua ngushëllim nuk mund të ketë…”.
Ky postim i papritur ka habitur fansat e Florit, të cilët janë duke pritur me kureshtje nëse bëhet fjalë për një projekt muzikor, apo thjesht një mesazh simbolik nga artisti.
