Kur flasim për propozime martese, gjithçka ka rëndësi: momenti, vendi, atmosfera. Një darkë romantike, një udhëtim surprizë apo edhe dhoma e gjumit – secili ka stilin e vet. Por a është e pranueshme që të marrësh mikrofonin në dasmën e mikut tënd dhe të ulesh në gjunjë para partneres?
Ekspertja e njohur e etiketës, Jacqueline Whitmore, e ka shumë të qartë përgjigjen: “Është në shije të keqe të shpallësh lajmin tënd të madh në një dasmë që nuk është e jotja.”
Sipas saj, një veprim i tillë jo vetëm që heq vëmendjen nga çifti i sapomartuar, por duket sikur po bërtet: “Hej, shikoni mua, jam më i rëndësishëm se nusja dhe dhëndri!”
Whitmore shpjegon se është e kuptueshme që njerëzit mezi presin ta ndajnë lajmin e tyre të fejesës, por duhet të kenë pak durim: “Mund ta bëni pasi të ketë mbaruar dasma. Përndryshe, dukeni egoistë dhe narcistë.”
Por jo vetëm kaq. Ekspertja ka edhe disa “mos” të tjera për ceremonitë:
Mos bëni ‘cake smash’, pra mos ia shtypni tortën në fytyrë partneres. “Ka kushtuar orë dhe para të rregullohet grimi dhe flokët. Për disa duket argëtuese, por në fakt prish gjithçka,” – thotë ajo. Në vend të kësaj, sugjeron një kafshatë intime me pirun apo edhe me gishta.
Mos postoni foto të nuses e dhëndrit para se ta bëjnë ata vetë. Sipas Whitmore, kjo është një tjetër mënyrë për të marrë vëmendjen që nuk ju takon.
Mos e teproni me alkoolin. Përveç se mund të turpëroni veten, mund të turpëroni edhe çiftin që ju ka ftuar.
Pra, për ta thënë shkurt: nëse planifikoni një propozim spektakolar, bëjeni në një ditë që është 100% e juaja. Dasma e dikujt tjetër nuk është skena për momentin tuaj romantik.
