Beteja ligjore mes ish-çiftit të njohur të Hollywood-it, Brad Pitt dhe Angelina Jolie, për pronësinë e vreshtarisë franceze Château Miraval ka marrë një kthesë të re. Sipas dokumenteve të dorëzuara në gjykatë në fund të tetorit, Pitt kërkon nga Jolie një kompensim prej rreth 30 milionë euro, në lidhje me shitjen e aksioneve të saj në pronë.
Në dosjen e re gjyqësore janë përfshirë edhe komunikime elektronike midis përfaqësuesve ligjorë të të dy palëve, që lidhen me shitjen e pjesës së Jolie në vitin 2021. Një prej email-eve të përfshira tregon se avokatët e aktores e akuzojnë Pitt për “krijimin e vështirësive të panevojshme” gjatë procesit, duke theksuar se kërkesa e tij për dëmshpërblim është “produkt i veprimeve të tij”.
Në një tjetër korrespondencë, thuhet se aktori ka kërkuar një “kompensim të përhershëm” për dëmet që, sipas tij, i janë shkaktuar biznesit të Miraval. Nga ana tjetër, ekipi ligjor i Jolie pretendon se Pitt ka refuzuar të dorëzojë dokumente që lidhen me marrëveshjen e konfidencialitetit katërvjeçare, të cilën ata e konsiderojnë thelbësore për zbardhjen e plotë të çështjes.
Procesi gjyqësor filloi në vitin 2022, kur Pitt paditi Jolie për shitjen e pjesës së saj pa miratimin e tij. Aktorja, nga ana tjetër, mohoi ekzistencën e një marrëveshjeje të tillë dhe e akuzoi ish-bashkëshortin se po e përdor sistemin gjyqësor për “motive hakmarrjeje personale”.
