Pas muajsh tensionesh, replika publike dhe deklaratash të ashpra, duket se Jozefin Marku (Jozi) ka vendosur të ndryshojë drejtim. Ai ka surprizuar ndjekësit duke ndarë në Instagram disa foto nga një drekë ku shfaqet përkrah Sali Lushajt, babait të reperit Stresi — një takim që menjëherë ndezi thashethemet për një “armëpushim” mes palëve.
Kjo lëvizje e papritur vjen pas një periudhe të gjatë përplasjesh, që nisën pas daljes së Jozit nga “Big Brother VIP Albania”. Dikur, të dy reperat shkëmbyen akuza dhe deklarata të forta në rrjete sociale, madje një video e famshme ku Jozi i afrohej Stresit për ta puthur u kthye në temë virale. Stresi reagoi ashpër në atë kohë, duke sqaruar se “përqafimi nuk ishte miqësor” dhe se Jozi “gabonte” në qëndrimet e tij.
Por sot, duket se klima është më e qetë. Vetë Jozi ka theksuar se nuk ka asnjë konflikt personal me Stresin dhe se takimi me babain e tij ishte një moment normal mes njerëzve që kanë respekt të ndërsjellë.
“Ai ka impenjimet e veta, unë të miat. Por ne gëzojmë respekt për njëri-tjetrin dhe për familjet. I urojmë njëri-tjetrit vetëm të mirat,” – është shprehur Jozi.
Nëse ky është fundi i “luftës” mediatike mes dy artistëve, mbetet për t’u parë — por një gjë është e qartë: Jozi ka bërë hapin i pari.
