Orlando Bloom ka ndezur rrjetin me një foto të re që shumëkush e ka interpretuar si një “goditje” ndaj ish-partneres së tij, Katy Perry.
Aktori 48-vjeçar u shfaq në një festë të Halloween-it në krah të aktores Rachel Lynn Matthews — e cila, rastësisht (apo jo), ishte veshur pikërisht si Katy Perry. Rachel kishte zgjedhur një kostum blu identik me atë që këngëtarja mbante gjatë udhëtimit të saj në hapësirë me “Blue Origin”, dhe kishte kompletuar pamjen me një paruke të zezë.
Në mënyrë ironike, ajo madje imitoi edhe momentin kur Katy puthi tokën pas zbritjes nga kapsula hapësinore, duke e përjetësuar skenën me mbishkrimin:
“Take up space!” (“Zë shumë vend!”)
Fansat nuk e morën aspak me humor. Pozimi i Orlandos përkrah “kopjes” së ish-it të tij u duk për shumë prej tyre si një tallje publike. “Kjo është shumë e pavend, sidomos për dikë me të cilin ai do të duhet të bashkëprindërojë”, shkroi një përdorues në Reddit, ndërsa një tjetër shtoi me tone të ashpra:
“Krejtësisht pa shije dhe pa respekt.”
Marrëdhënia nëntëvjeçare e Orlando Bloom dhe Katy Perry përfundoi në korrik, pas së cilës dyshja ka vijuar rrugë të ndryshme. Ata kanë një vajzë pesëvjeçare, Daisy Dove.
Ndërsa Katy është përfolur për një romancë të re me ish-kryeministrin kanadez Justin Trudeau, me të cilin është parë në një jaht luksoz në Kaliforni, Orlando duket se po e jeton beqarinë në mënyrën e vet — i fotografuar së fundmi me një brune misterioze në Chelsea.
E megjithatë, postimi i tij i fundit ka ngritur një pyetje të vetme në rrjet: a ishte thjesht një shaka… apo një “thumb” i menduar mirë për Katy Perry?
