Britania mendoi se i njihte të gjithë emrat “hot” të high-society… derisa këtë vit “Tatler Little Black Book” – libri i famshëm që prej dekadash quhet “Bibla” e beqarëve – vendosi t’i vendosë të gjithë në radhë pas një 18-vjeçari që deri dje dukej anonim: Albert Windsor.
Në pamje të parë, një djalosh i qetë. Por pas mbiemrit të tij fshihet një pemë gjenealogjike që do ta kishin zili edhe serialet mbretërore të Netflix-it. Albert është kushëri i Mbretit Charles dhe nip i Princit Edward, Dukës së Kentit, titull që një ditë pritet ta trashëgojë.
Lindur në vitin 2007 në Londër, djali i Lord Nicholas dhe Paola Frankopan është rritur mes elitës kroate e italiane — por fëmijërinë e kaloi larg syve të kamerave, në Romë, me dy vëllezërit e tij Leopold (16) dhe Louis (11). Që në javët e para të jetës, ai bëri histori si fëmija i parë mbretëror i pagëzuar katolik që nga viti 1688.
Edhe pse është pjesë e familjes mbretërore britanike, Alberti nuk ishte i pranishëm në jetën publike të Mbretërisë së Bashkuar deri në shtator, kur mbushi 18 vjeç. Po të mos ishte për vendimin e të atit për t’u konvertuar në katolicizëm në vitin 2001, ai do të ishte sot i 37-ti në radhën e fronit.
Në javët e fundit, profili i tij është rritur si rrufeja. Ai u pa në funeralin e gjyshes, Dukeshës së Kentit, ku – sipas raportimeve – qëndroi pranë Princit William, Princeshës Kate dhe Mbretit Charles. Një sinjal i qartë se Alberti ruan marrëdhënie të afërta me figurat më të rëndësishme të monarkisë.
“Tatler” sugjeron se ai do të marrë pjesë në eventin e famshëm Le Bal në Paris, një ballo ndërkombëtare ku debutojnë të rinjtë më të privilegjuar të botës. Nuk është habi që revista tashmë e përshkruan si “ndeshja më e mirë e vitit”.
Dhe nëse vendos të ndjekë universitetin në Oksford, pikërisht në Teologji si i ati? Ekspertët thonë se mund të përsëritet fenomeni i Princit William në St Andrews, kur aplikimet u rritën me 44% – kryesisht nga vajza të reja.
Por jeta pranë kurorës nuk është gjithmonë përrallë. Meghan Markle e ka përshkruar jetën në mbretëri si “pothuajse të pajetueshme”, ndërsa aktorja Sophie Winkleman, e martuar me Lord Frederick Windsor, e cilësoi së fundmi rutinën mbretërore si “ferr” dhe “një formë torture”.
Ndërsa bota e high-society gumëzhin me emrin e tij, një gjë është e sigurt: Albert Windsor sapo ka hyrë në skenë – dhe të gjithë po duan të dinë më shumë.
