Në “Goca dhe Gra” në Top Channel, e ftuar ishte Sara Kapo, vajza e aktores Ema Andrea. Gjatë bisedës, Ema vendosi t’i dedikonte Sarës disa fjalë të veçanta, duke theksuar se shprehjet e dashurisë mes nënës dhe vajzës nuk janë kurrë të tepruara. Ajo e nisi dedikimin kështu:
“Kur u vendos të ftohet këtu fati im i jetës time, që je ti, artistja Sara, po mendonim se nuk mund ta mohoj që diçka artistike duhet ta sillja për ty, për publikun, e ku di unë. Dhe po mendoja të të thoja një poezi, por pastaj u ula e thashë ta shkruaj vetë.”
“Nuk do qajmë, se e di që ti s’i do të qarat në televizion, ashtu si s’i dua as unë. Por sot po e themi hapur dashurinë dhe, tekefundit, nëse një nënë shpreh dashurinë për fëmijën e vet, s’ka pse të quhet gjë e pahijshme.”
Më pas, Ema Andrea ndau disa reflektime të sinqerta të një nëne për vajzën e saj, të mbushura me “më fal” dhe “faleminderit”, duke pranuar përgjegjësi për shqetësime që mund t’i ketë shkaktuar vetë:
“Kur e shkrova këtë poezi që doli poemë, kishte shumë ‘më fal’ dhe shumë ‘faleminderit’. Ishte e gjatë. Nuk dija si t’i ndaja sekretet në rreshta. Mbaj mend pak, përveç faktit që të kërkoj falje se, duke u përpjekur të të ruaj nga hijet e mia, unë të kam shtuar rrathë në sy.
Se kur ndiej dridhje në tingullin tënd, më duket sikur vijnë prej mungesave të mia. Se… se s’do doja kurrë që ti të rriteshe me fjalinë e gabuar ‘mos, se mërzitet mami’, se tani ti je një grua.”
Duke përmendur edhe një moment shumë të vështirë që të dyja e kanë përjetuar, Ema Andrea falënderoi Sarën në mënyrën më të ndjerë:
“Dhe fjala jote, që unë do ta mbaj me vete gjithë jetën, ishte e një nate ku mua më dukej sikur po humbisja qetësinë… dhe ti the: ‘O ma, akoma s’ke fjetur?’
Unë jam sot këtu me ty prej asaj fjale. Dhe doja të të thosha, që ta mbyll, se… Zoti ma dha jetën, ti më mësove ta dua. E midis Zotit edhe teje, unë zgjedh ty.”
