Pas largimit të saj nga “Big Brother VIP Kosova”, Linda Rei ka ndarë publikisht versionin e saj për çfarë ka ndodhur prapa kamerave, duke u fokusuar te problemet shëndetësore dhe mungesa e mbështetjes që pretendon se ka marrë nga produksioni.
Sipas saj, producentja Olsa Muhameti ishte e gatshme të shkonte shumë larg për hir të shikueshmërisë. “Uria që ka patur Olsa, producentja e atij emisioni që është e gatshme të shkeli me këmbë çdo kënd dhe çdo njeri që ta rrisi emisionin kudo. Duhet të jetë kështu një producent, por jo me shëndetin”, u shpreh ajo, duke theksuar se nuk kishte marrë mjetet e nevojshme për të monitoruar diabetin tip 1.
Linda tregoi gjatë bisedës me Grida Dumën se ka qenë e detyruar të braktisë formatin për shkak të gjendjes së rënduar fizike. Ajo pretendon se as premtimi për një pajisje matëse të diabetit nuk u mbajt. “Mua më mashtruan. Unë i thashë përpara se të fillonte emisioni ma jepni ta vendos… dhe në momentin që unë u futa dhe nuk ishte, doja të dilja. Më kanë mashtruar një javë të tërë,” tha ajo, duke shtuar se reagimi i natës së parë ishte pasojë e shqetësimeve shëndetësore dhe jo dëshirë për vëmendje.
Edhe pas largimit, Linda thotë se ndihet keq që nuk arriti të përfundonte lojën. “Më vjen shumë keq që s’jam aty. Nuk jam penduar se po vdisja aty brenda, por kam qenë gati për atë format,” u shpreh ajo, duke falënderuar banorët për respektin ndërsa theksoi se e gjithë pakënaqësia lidhet vetëm me produksionin.
Në disa raste, Linda pretendon se situatat janë shtyrë qëllimisht drejt konfliktit për të rritur audiencën. “Show me shëndetin tim nuk bëj,” tha ajo, ndërsa shpjegonte se vështirësitë fizike e kishin çuar deri në kufij të padurueshëm brenda shtëpisë.
Në fund, ish-banorja shtoi se shëndeti i saj duhet të kishte qenë prioritet dhe se premtimet për pajisje shëndetësore ishin marrë shumë më herët, burime të cilat, sipas saj, nuk iu ofruan asnjëherë gjatë qëndrimit në shtëpi.
