Finalja e Miss Universe 2025 është kthyer në një seri ngjarjesh që askush s’i kishte parashikuar. Vetëm pak ditë para spektaklit përmbyllës, konkurrentja nga Xhamajka, Dr. Gabrielle Henry, u përfshi në një aksident të rëndë gjatë provave në Tajlandë, duke “pësuar hemorragji intrakraniale dhe fraktura të shumta në fytyrë”, sipas organizatorëve.
Më 19 nëntor, gjatë një momenti rutinë në skenë, Henry humbi ekuilibrin dhe ra, duke shkaktuar panik tek stafi dhe konkurrentet. Ajo “u shtrua në spital në gjendje kritike” dhe vijon të marrë trajtim në kujdesin intensiv në Bangkok. Ekipi mjekësor e monitoron 24 orë pa ndërprerje ndërsa organizatorët kanë konfirmuar se “do të mbulojnë të gjitha shpenzimet e trajtimit dhe shtrimit të saj në spital”.
Pamjet e incidentit janë shpërndarë gjerësisht online dhe kanë shtuar tronditjen publike. Henry “humbi ndjenjat menjëherë” dhe u transportua me urgjencë nën kujdes mjekësor. Ndërkohë, familjarët e saj ndodhen tashmë në Tajlandë për ta mbështetur. Nëse gjendja e saj stabilizohet, ajo pritet të kthehet në Xhamajka “me shoqërim të plotë mjekësor”.
Ky episod i rëndë vjen në një moment kur Miss Universe 2025 është tashmë nën vëmendje për arsye të tjera. Vetëm disa javë më parë, një deklaratë e organizatorit Nawat Itsaragrisil, i cili e quajti Miss Meksikën “budallaqe”, shkaktoi largimin e konkurrentes nga eventi dhe polemika të shumta; Itsaragrisil u detyrua të japë dorëheqjen nga pozita e tij.
Ngjarja e Gabrielle Henry ka rritur edhe më shumë presionin ndaj konkursit, duke krijuar një atmosferë të rënduar dhe shumë pikëpyetje për vijimin e edicionit. Konkurrentet dhe publiku presin informacione të reja për shërimin e Miss Xhamajkës, ndërsa organizatorët përballen me kritika të forta pas një sërë incidentesh të paprecedentë.
