Vetëm dy ditë na ndajnë nga nisja e Festivalit të Këngës në Radio Televizionin Shqiptar dhe përgatitjet kanë hyrë në fazën më intensive. Fest 64 do të zhvillohet më 17, 18, 19 dhe 20 dhjetor në skenën e Pallatit të Kongreseve, duke i ofruar publikut katër netë muzikë, emocione dhe spektakël.
Në kuadër të këtyre përgatitjeve, prezantuesit e këtij edicioni, Arilena Ara dhe Salsano Rapi, janë “izoluar” prej ditësh për provat e skenarit. Dyshja po punon intensivisht për rrjedhën, ritmin dhe detajet e moderimit, me synimin për të sjellë një prezantim dinamik dhe të kuruar në çdo aspekt.
Nën kujdesin e skenaristit të Fest 64, Koloreto Cukali, siç shihet edhe nga pamjet e publikuara, çdo element i prezantimit po analizohet me imtësi, për të garantuar një moderim elegant dhe në harmoni me frymën e festivalit.
Me provat që po shkojnë drejt fundit dhe emocionet që shtohen dita-ditës, gjithçka është gati që Festivali i Këngës në RTSH të rikthehet si një nga ngjarjet më të rëndësishme dhe më të ndjekura të fundvitit.
