Leonardo DiCaprio ka habitur fansat duke zbuluar se nuk e ka parë asnjëherë filmin legjendar “Titanic” të James Cameron, një nga projektet më ikonike të karrierës së tij. Aktori fitues i çmimit Oscar e bëri këtë deklaratë gjatë një bisede me Jennifer Lawrence në episodin më të fundit të “Actors on Actors” nga Variety dhe CNN, i transmetuar të mërkurën, më 17 dhjetor.
Gjatë intervistës, Jennifer Lawrence e pyeti drejtpërdrejt:
“E ke parë ndonjëherë ‘Titanic’-un?”,
ndërsa DiCaprio u përgjigj pa hezitim:
“Jo. Nuk e kam parë kurrë.”
Ai shpjegoi se zakonisht shmang shikimin e filmave ku luan vetë:
“Unë nuk i shikoj filmat e mi. A i shikon ti?”, e pyeti ai Lawrence-in, e cila iu përgjigj shkurt:
“Jo.”
Lawrence u përpoq ta bindte aktorin ta shihte filmin, duke i thënë:
“Oh, duhet ta shikosh. Mund ta shohësh tani, është vërtet shumë i mirë.”
Biseda u shoqërua edhe me humor, teksa aktorja shtoi:
“Nuk kam bërë kurrë diçka si ‘Titanic’. Nëse do ta kisha bërë, do ta kisha parë patjetër. Një herë, kur isha shumë e dehur, pashë ‘American Hustle’. Mendova: ‘Pyes veten nëse jam e mirë në aktrim?’ E pashë filmin, por nuk mbaj mend se cili ishte përfundimi.”
Në një intervistë për Esquire në gusht të vitit të kaluar, DiCaprio kishte pranuar se rrallë i shikon projektet e tij, por kishte përmendur një përjashtim:
“Rrallë shoh filmat e mi, por ka një që e kam parë më shumë se të tjerët: ‘The Aviator’. Kisha punuar me Marty [Scorsese] në ‘Gangs of New York’ dhe kisha mbajtur një libër për Howard Hughes për 10 vjet.”
Deklarata e DiCaprio-s ka ngjallur reagime të shumta në rrjet, duke rikthyer edhe një herë vëmendjen te “Titanic”, filmi që e shndërroi atë në një ikonë globale.
