Pas postimit që ngjalli kureshtje në rrjet, ku Romeo Veshaj vendosi simbolikisht një “X” mbi disa nga rrugët më tradicionale të karrierës së tij, po dalin në dritë detaje të reja mbi atë që pritet të jetë një fazë krejt tjetër për të. Ky veprim nuk ishte thjesht një lojë me simbole, por një sinjal i qartë për një ndryshim të madh në drejtimin profesional.
Mesa duket, Romeo ka vendosur të largohet nga formatet klasike dhe të fokusohet në hapësirën online, ku synon të ndërtojë diçka tërësisht personale. Projekti i ri pritet të marrë formën e një platforme digjitale, ku ai do të ketë liri të plotë kreative dhe kontroll absolut mbi përmbajtjen.
Në qendër të kësaj nisme thuhet se do të jetë një format mëngjesi, i ndërtuar mbi biseda spontane, tema aktuale dhe një komunikim të drejtpërdrejtë me ndjekësit.
Por ambiciet nuk ndalen këtu. Shumë është folur edhe për një rikthim të një formati mbrëmjeje, në linjën e “Late Night Show”, një zhanër ku Romeo ka lënë gjurmë më herët dhe që u kthye në një nga më të ndjekurit nga publiku.
Mesa duket, “X”-i i publikuar së fundmi shënon fundin e një kapitulli dhe nisjen e një tjetri, ku rregullat i vendos vetë ai.
