Deklaratat e forta të Albano Bogdos kanë ngjallur reagime të shumta. I ftuar në emisionin “Qoa Vadis” në Vizion Plus, aktori foli hapur për realitetin shqiptar, duke e cilësuar situatën ekonomike dhe sociale si pasojë të dështimit shumëvjeçar të politikës.
Bogdo theksoi paradoksin e një vendi të pasur me burime natyrore, por ku qytetarët përballen me çmime të papërballueshme për shërbimet bazë. Sipas tij, energjia, uji dhe nafta duhej të ishin të përballueshme, nëse jo falas, për një vend si Shqipëria.
“Futemi në 10 vendet që kemi më shumë ujë për kokë dhe asnjë familje nuk ka ujë 24 orë. Dhe në këto hidrocentrale mund të ndërtohen me qindra hodrocentrale dhe mund ta kemi korrentin falas, fatura e energjisë është makthi më i madh i familjeve shqiptare.”
Aktori vijoi duke kritikuar mungesën e përgjegjësisë ndër vite, duke mos kursyer asnjë krah politik dhe asnjë periudhë historike.
“Asnjë artist nuk del të thojë që paga u bë nga 400 në 500 mijë lekë të vjetra, 500 mijë lekë këta në pushtet kanë brekët, siç ua kapën mat aty. Brekët më të lira i kishin 500 mijë lekë, aq sa ne kemi pagën minimale. Si nuk del që nuk flet se ka 40 vjet që vidhet nafta, nuk po flas për vetëm për Ramën, por po flas për të gjithë bashkë, që nga Ismail Qemali e deri ky që është sot. Asnjë se rregulloi dot që të kemi ujë, drita dhe naftën tonë që del ta kemi ne. Duhet ta kishim falas dhe ne e kemi më shtrenjtë se kushdo tjetër në Europë.”
Por ajo që e bëri deklaratën edhe më tronditëse ishte kritika e drejtpërdrejtë ndaj komunitetit artistik, të cilin Bogdo e akuzoi për heshtje dhe nënshtrim.
“Doni politikë ju? Kjo është kartolina ime për vitin e ri, artistët janë një m*t i madh në Shqipëri. Të gjithë gënjejnë dhe të gjithë janë të blerë. Të gjithë ulin kokën se kanë frikë nga pronarët e mediave dhe askush nuk e thotë të vërtetën në sy, e vërteta është që ne jemi një komb fatkeq, dhe shyqyr që kemi këto festat që të takojmë dhe të puthim njëri-tjetrin.”
