Mbrëmja e fundit në Big Brother VIP Albania solli një nga momentet më emocionale dhe më të diskutuara të këtij edicioni, me në qendër banorin Mal Retkoceri.
Gjatë spektaklit, Mali, djali i këngëtares së njohur Violetë Kukajt, u përball me një vendim thellësisht personal: ai zgjodhi të mos takojë babanë e tij, me të cilin nuk ka pasur asnjë kontakt prej shtatë vitesh. Edhe pse produksioni i dha mundësinë për një përballje pas një kohe kaq të gjatë, Mali u shpreh hapur se nuk ndihej ende gati për një takim të tillë, veçanërisht nën presionin e kamerave dhe vëmendjes së publikut.
Ai sqaroi se ky vendim nuk përbënte një refuzim përfundimtar, por një zgjedhje të vetëdijshme për ta ruajtur këtë moment për një kohë dhe rrethana më të përshtatshme. Mali theksoi se një ditë do ta takojë të atin, por larg syrit të publikut, duke respektuar veten dhe historinë e tij personale.
Vendimi i tij u shoqërua me shumë emocione edhe jashtë shtëpisë së BBVIP, ku familja reagoi menjëherë duke i qëndruar pranë. Nëna e tij, Violetë Kukaj, reagoi në rrjetet sociale me një mesazh të shkurtër, por shumë domethënës:
“Lum nana për ty, Zoti të rujtë”, shkroi ajo, duke shprehur hapur krenarinë për të birin.
Ndërkohë, motra e Malit publikoi një fotografi të tij, ku ai shihet me një kurorë mbi kokë, një simbolikë që u interpretua nga ndjekësit si shenjë mbështetjeje të plotë dhe një mesazh i qartë se familja është në një mendje me vendimin e tij për të ruajtur distancën nga i ati.
