Zërat kishin ditë që qarkullonin në prapaskenë, por asgjë nuk ishte konfirmuar zyrtarisht. Deri sot. Rikthimi i Luiz Ejllit në Big Brother VIP Albania 5 nuk është më thashethem, por fakt i konfirmuar edhe nga vetë Top Channel, duke ndezur menjëherë një valë emocionesh dhe reagimesh në publik.
Në një video të publikuar së fundmi, Luizi shfaqet në Dhomën e Rrëfimit, ndërsa dëgjohet qartë zëri i Vëllait të Madh: “Luiz, në Dhomën e Rrëfimit”, një frazë e thjeshtë që mjaftoi për të rikthyer atmosferën e një sezoni që ende jeton fort në kujtesën kolektive.
Vetë Luizi, me një deklaratë që u lexua menjëherë si provokuese dhe simbolike, u shpreh: “Tani luftohet vetëm për vend të dytë”, një fjali që për fansat u interpretua si rikthim i një figure që dikur dominoi lojën, por që sot hyn në një realitet krejt tjetër, ku rolet, balancat dhe pritshmëritë kanë ndryshuar. Ende nuk dihet se çfarë fshihet realisht pas këtij rikthimi dhe nëse bëhet fjalë për një lëvizje strategjike afatshkurtër apo për një prani më të zgjatur në shtëpi, megjithëse informacionet paraprake flasin për një qëndrim disa-ditor.
Në të njëjtën kohë, zërat e lidhin këtë rikthim me projektin kinematografik që Luizi ka realizuar së fundmi me Kiara Titon, duke e parë hyrjen në BBV si një formë promovimi të heshtur, por jashtëzakonisht efektive, në një format që garanton vëmendje maksimale mediatike.
Vetë Luizi ka lënë të kuptohet se ka pasur oferta dhe se “me një lëvizje të vetme do e marrin përgjigjen të gjithë”, duke shtuar misterin rreth prapaskenës së vendimit të tij.
Megjithatë, çfarëdo që të fshihet pas këtij rikthimi, një gjë është e sigurt: e shtuna tashmë është shënjuar në kalendarin e publikut. Vëmendja është maksimale, emocionet janë ndezur dhe BBV5 po përgatitet për një moment televiziv që pritet të dominojë diskutimin publik.
Videoja e publikuar nga Top Channel, ku Luizi shfaqet sërish në Dhomën e Rrëfimit, është vetëm preludi i një nate që premton nostalgji, kuriozitet dhe surpriza.
