Ermal Mamaqi ka ndarë një rrëfim të pazakontë dhe mjaft personal në “Grida Duma Podcast”, duke treguar se humori, që e ka bërë një nga figurat më të njohura të ekranit shqiptar, ka lindur si një nevojë e hershme për të krijuar paqe brenda familjes.
“Në fakt, humori, kjo aftësi e imja, ka lindur nga një nevojë që unë kam pasur për të krijuar paqe në familjen time. Është e dhimbshme kur e dëgjon, ose kur e kupton, që këtë aftësi unë e kam zhvilluar si një mënyrë për të ulur gjakrat. Kishte konflikte? Ka pasur, si në çdo familje shqiptare”, u shpreh Mamaqi.
Aktori dhe moderatori rrëfeu se shpesh e ka përdorur humorin për të zbutur tensionet dhe për të qetësuar situata të vështira mes prindërve të tij.
“Edhe sot, me këtë nivel që jemi duke jetuar jetën, i them prindërve të mi me shaka: ‘Si nuk jeni ndarë deri tani, hallall!’ Zihen ndonjëherë si Tomi me Xherri dhe unë u them menjëherë: ‘Divorcin jua paguaj unë. Njëri të mbajë shtëpinë, tjetrit i paguaj qiranë gjithë jetën’”, tregoi ai mes humorit.
