Meghan Markle nuk “del” thjesht në një gala. Ajo kompozon një skenë. Dhe këtë fundjavë, në Fifteen Percent Pledge Gala në Los Angeles, Dukesha e Sussex-it u shfaq me një elegancë të ftohtë, klasike. Një pamje që, siç shkruan The News, “i la të gjithë gojë hapur” me look-un e saj më të fundit.
Në pamjet që ajo publikoi më pas në Instagram, Meghan shfaqet e qeshur, e sigurt, me një fustan bustier ngjyrë oyster, me dekolte zemër të konturuar me piping të zi, i realizuar me porosi nga Harbison Studio. Mbi të, një shall i zi (velvet dhe silk) që zgjatej në një bisht dramatik, duke i dhënë pamjes atë teatralitet të kontrolluar që e bën një dalje të duket e paharrueshme.
Flokët i mbajti në një “top” të rregullt, me make-up elegant e minimal, ndërsa sandalet e zeza Stuart Weitzman dhe vathët me diamant në formë “drop” e mbyllën look-un me një luks të qetë. Dhe pikërisht kjo është estetika e saj më e fortë, minimalizëm i kontrolluar, me një prekje “film noir” që e bën të duket njëkohësisht moderne dhe nostalgjike.
Në klipet që më pas publikoi në Instagram, duket qartë se ky ishte një moment i kuruar për kamerën, por edhe për simbolikën e eventit. Një natë ku prania në tapetin e kuq shkon paralel me idenë e një kauze.
Por kjo dalje nuk shikohet vetëm si modë. Brenda rrethit mediatik, flitet se Meghan po mendon të zgjerojë më tej projektet e saj dhe The News përmend se ka “biseda në horizont” për një zgjerim të ambicieve të saj. Ndërsa një burim i tha Closer Magazine se Harry “beson se nuk është ide e mirë”, duke pasur parasysh “projektet e dështuara radhazi me Netflix”.
E gjitha, e kthen eventin në diçka më shumë se një tapet i kuq, në një sinjal se Meghan po ecën përpara me kursin e saj, edhe kur zërat rreth saj vazhdojnë të jenë të polarizuara.
Në fakt kjo është Meghan siç e njeh publiku, një figurë që e kthen çdo dalje në një kapitull. Këtë herë, kapitulli dukej i qartë, glamour klasik, kontroll i imazhit dhe një rikthim në skenën e Los Angeles-it, jo për t’u parë, por për t’u lexuar.
