Në Big Brother VIP 5, mjafton një frazë e thënë me humor të saktë që shtëpia të ndryshojë ritëm. Dhe këtë rol, Luizi e di si ta luajë me batutë, me provokim të butë, por edhe me atë lloj “telekomande” që i ndez menjëherë debatet.
Sapo hyri në shtëpinë më të famshme në Shqipëri, ai nisi t’i ngacmojë banorët me atë që publiku e do më shumë: dashurinë, tensionin dhe një skenar që tingëllon si “lojë”.
Këtë herë, shënjestra ishte dinamika Juela–Stenaldo. Luizi hodhi një ide të thjeshtë, por me jehonë të madhe, një dasmë brenda Big Brother Vip 5. Dhe e tha me një betim që tingëllon si “premtim televiziv”:
“Pasha Zotin, po u martove, me kë të duash ti”, duke e ngritur menjëherë lojën në nivel spektakli.
Stenaldo nuk e la gjatë në ajër. Përgjigjja e tij e shkurtër “Po” ishte mjaftueshëm për t’i dhënë “dritë jeshile” rrëfimit.
Aty Luizi e çoi batutën në një tjetër territor atë të show-t brenda show-t, duke futur edhe “këngëtarin” në mes si garanci feste:
“Po nuk të solla unë këngëtarin që do ti të këndojë këtu”.
Dhe si për ta bërë edhe më të gjallë panoramën, e shtriu opsionin në gjithë hapësirën shqiptare:
“Shqipëri, Kosovë, Maqedoni, vërja gishtin ti. Kë të duash ti, grup, këngëtar, këngëtare, edhe në qoftë se është shtatzënë”.
Stenaldo ia ktheu me një fjali të drejtpërdrejtë, “Do të marr ty”. Por Luizi, si gjithmonë, e mbajti rolin e moderatorit provokator dhe e vulosi momentin me një fjali që u bë “titull” brenda bisedës:
“Mua me ke të shtëpisë, unë jam prifti.”
Dhe pastaj për “goditjen” finale, Luizi iu drejtua Juelës, jo për ta lënë thjesht si shaka mes djemsh, por për ta kthyer në deklaratë:
“Juelë a do kishte bërë dasmë me Stenaldon?”
Përgjigjja e saj erdhi pa shumë hezitim, aq sa mjaftoi të ndizte imagjinatën e publikut:
“Edhe e kisha bërë.”
Në BBV, “dasma” nuk është kurrë vetëm dasmë. Është edhe provë ndjenjash, test i guximit, shenjë aleancash dhe mbi të gjitha, është një temë që e mban shtëpinë dhe publikun të mbërthyer. Pyetja tani nuk është nëse Luizi po bën humor por nëse, pa e kuptuar, a e shtyu çiftin Stenaldo – Juela drejt një momenti që s’mund të zhbëhet më nga kamera?
