Në një moment kur marrëdhënia mes tyre duket më e tensionuar se kurrë, David dhe Victoria Beckham zgjodhën të bëjnë një gjest publik për djalin e tyre të madh, Brooklyn. Me rastin e 27-vjetorit të tij, çifti publikoi në rrjetet sociale foto të vjetra familjare, duke rikthyer kujtimet e hershme dhe duke dërguar një mesazh të qartë dashurie, pavarësisht krizës që ka dalë në sipërfaqe në familjen e tyre.
Victoria Beckham ndau dy fotografi nga arkiva familjare dhe e shoqëroi postimin me fjalët:
“Gëzuar 27-vjetorin, Brooklyn. Të dua shumë”.
Ndërsa David Beckham publikoi gjithashtu disa foto të vjetra në Instagram Story dhe shkroi shkurt:
“27 sot. Gëzuar ditëlindjen, Bust. Të duam”. Një dedikim i thjeshtë, por që për fansat u interpretua si një përpjekje për të ruajtur një urë komunikimi mes prindërve dhe djalit të tyre.
Brooklyn po e feston ditëlindjen në Los Angeles, mijëra kilometra larg prindërve të tij të famshëm, të cilët ndodhen në Paris për prezantimin e koleksionit më të fundit të Victoria Beckham. Momenti vjen vetëm pak javë pasi konflikti familjar u bë publik, kur Brooklyn konfirmoi në një deklaratë të gjatë në Instagram se marrëdhënia me familjen e tij është përkeqësuar dhe se ai nuk dëshiron të pajtohet me ta.
Megjithatë, ndërsa David dhe Victoria kanë zgjedhur të mos komentojnë publikisht akuzat e djalit të tyre, urimet për ditëlindje tregojnë se, të paktën nga ana e tyre, dera për një ribashkim mbetet ende e hapur.
