Një mbrëmje që nisi si festë ditëlindjeje u shndërrua në një moment të paharrueshëm dashurie. Biznesmeni Erolld Belegu vendosi që ditëlindjen e tij të 60-të ta kthente në një surprizë romantike për partneren e tij, nutricionisten e njohur Diola Dosti. Në një atmosferë elegante dhe të ngrohtë, mes muzikës live dhe të ftuarve të afërt, Belegu u ul në gjunjë dhe i propozoi për martesë, duke e kthyer festën në një skenë që emocionoi të gjithë të pranishmit.
Momenti u bë publik edhe në rrjetet sociale, ku Diola ndau me ndjekësit emocionin e asaj nate, duke konfirmuar se kishte pranuar propozimin. Në postimin e saj ajo shkroi:
“Thashë PO se i dhe dritë shpirtit tim”. Një fjali e shkurtër, por e ngarkuar me ndjenjë, që shoqëronte fotot ku ajo shfaqet me unazën e fejesës në dorë, ndërsa çifti feston mes miqve dhe familjarëve.
Historia e tyre e dashurisë është ndjekur me interes edhe nga publiku. Diola Dosti dhe Erolld Belegu e bënë publike lidhjen në mars të vitit 2024 dhe që atëherë kanë ndarë shpesh momente nga jeta e tyre së bashku me ndjekësit. Marrëdhënia e tyre ka qenë shpesh në qendër të vëmendjes edhe për diferencën në moshë mes tyre, pasi Belegu është rreth 21 vite më i madh se partnerja e tij. Megjithatë, propozimi romantik në ditëlindjen e tij të 60-të duket se shënon një kapitull të ri për çiftin, që tashmë ka vendosur ta çojë lidhjen drejt martesës.
