Mbrëmja e sotme shënon nisjen e një prej formateve më të shumëpritura në ekranin shqiptar, Ferma VIP. Ky reality show premton të sjellë një kombinim interesant të jetës në natyrë, sfidave fizike dhe dinamikave sociale mes personazheve të njohur. Këtë edicion, drejtimin e spektaklit do ta marrë Arbana Osmani, duke shtuar edhe më shumë pritshmëritë e publikut.
Ndërsa kurioziteti për listën e plotë të konkurrentëve mbetet i lartë, tashmë është konfirmuar një emër që pritet të sjellë energji dhe humor: aktori i dashur për publikun, Elvis Pupa.
Së fundmi, i ftuar në podcastin Zë me Mirën, ai ka ndarë disa detaje mbi vendimin për t’u bërë pjesë e këtij formati. Me stilin e tij karakteristik plot humor, Pupa tregoi se shtysa kryesore erdhi nga bashkëshortja e tij, Belina.
“Mendjen për t’u futur te ‘Ferma VIP’ ma mbushi Belina. Herën e parë në Big Brother VIP, ika sepse 16 vjet me gruan… thashë të rri 2 muaj në qetësi. Por asaj i pëlqeu kjo qetësi dhe më tha: futu edhe te ‘Ferma’,”, u shpreh ai me batuta, duke shkaktuar të qeshura.
Pjesëmarrja e Elvis Pupës pritet të jetë një nga pikat më të forta të këtij edicioni, falë natyrës së tij spontane dhe aftësisë për të krijuar momente argëtuese që tërheqin vëmendjen e publikut.
