Gazetari i njohur sportiv italian, Gianluca Di Marzio, ka publikuar në faqen e tij zyrtare në Facebook letrën e një tifozi italian, i cili ka emocionuar me fjalët e tij për kombëtaren shqiptare, referuar ndeshjes së të mërkurës me Francën, në “Velodrome”, të cilën e humbi “in extremis”, pas një beteje heroike. “Mbrëmjen e djeshme, pavarësisht rezultatit, keni bërë një punë të jashtëzakonshme. Ia dolët, falë vullnetit, kurajës dhe grintës suaj t’i kundërviheshit njërës prej kombëtareve më të forta të futbollit europian, ndoshta dhe botëror, – e nis letrën e tij ky tifoz italian, që quhet Simone Rizzo. Ju, ardhur nga një tokë sa e afërt, por dhe e largët në vështrimin e Mister De Biasit dhe të stafit të tij, arritët që në 99 minuta t’i tregonit Europës mbarë se nga çfarë brumi jeni gatuar. Kur ai top shkoi aq pranë, unë doja që të dilja në dritare, të bie në sheshin kryesor të qytetit dhe të bërtisja: Gol, Gol, Gol! Por fatkeqësisht topi u ndalua në shtyllën pingule të portës dhe kundërshtari, shumë më i fortë se ju, pastaj shënoi dy gola në minutat e fundit. Ju keni djersitur shumë dhe ju siguroj se do të jeni njësoj të lumtur, edhe nëse do të shënoni vetëm një gol e nuk do të kaloni më tej në këtë Europian. Në këtë mënyrë do të vendosni emrin tuaj në listën e golashënuesve të këtij kampionati dhe askush, asgjë nuk mund ta fshijë përgjithmonë; pak a shumë siç keni bërë edhe në zemrën time, të një tifozi të pasionuar me futbollin. Dijeni se ashtu siç ju kam njohur unë, nuk do të ju harrojë Italia, edhe në Siçili, në Katania, në Valverde, do të keni gjithmonë një tifoz më shumë. Faleminderit për atë që keni bërë dhe faleminderit njëmijë herë për atë që do të bëni me të voglën, por të madhen zemrën tuaj. Forca Shqipëria!”
