Barcelona i shtohet listës së klubeve që janë vënë në gjurmët e mbrojtësit të Shqipërisë, Elseid Hysaj. Futbollisti 22vjeçar ka qenë titullar i padiskutueshëm për gjatë të gjithë sezonit të kaluar me skuadrën e Napolit, duke regjistruar plot 43 aktivizime në total, mes kampionatit, Kupës së Italisë dhe Europa League. Të interesuarit për Hysajn, e kanë parë atë të aktivizohet jo vetëm si mbrojtësi i djathtë, pozicioni i tij natyral, por gjithashtu edhe në krahun e majtë, duke qenë kështu një opsion i mirë për trajnerin e Barças, Luis Enrique, në rast se Jordi Alba do të ishte i pamundur për ta nisur nga minuta e parë
Hysaj shihet si zëvendësues i Dani Alves dhe opsion për mbulimin e krahut të majtë ku luan Jordi Alba. Mediat spanjolle sigurojnë se klubi Blaugrana është mjaft i interesuar për 22vjeçarin e Napolit, të inkurajuar edhe më shumë pas interesimit të shfaqur më parë për mbrojtësin nga ana e klubeve rivale si Atletico Madrid dhe Arsenal, të cilat e kanë monituruar lojtarin në shumë ndeshje. Por, në rastin e topçinjve, klubit të Arsene Wenger i është refuzuar oferta fillestare prej 19 milionë euro.
