Vetëm pak javë më parë ishte në Shqipëri për disa ditë pushime, për të takuar të afërmit dhe miqtë, por me sa duket, po mendon të rikthehet.
Pas garës në “American Idol”, në Amerikë, emri i Linda Halimit u bë i njohur edhe para emrave mjaft të njohur të muzikës që e vlerësuan zërin e saj, siҫ ishte Jennifer Lopez në talent show. Edhe pse rrugëtimi në kompeticion nuk qe shumë i gjatë, pjesëmarrja atje ishte një mundësi mjaft e mirë për këngëtaren shqiptare që shumë prej studiove muzikore ta hapnin lehtësisht derën për të.
Megjithatë, pjesëmarrja e fundit në Festivalin e RTSH-së, dy vjet më parë, kur u vlerësua me ҫmimin e tretë me këngën “S’të fal” i ka zgjuar sërish dëshirën për të qenë pjesë e këtij kompeticioni dhe për të synuar edhe fitoren, pse jo?
Në profilin e saj në Facebook, Linda ka shkruar një status me atë të të cilit u kërkon mendim fansave nëse duhet të rikthehet në Shqipëri për të marrë pjesë në festival.
“Si mendoni ju, të kthehem dhe njeherë në festivalin e fundvitit me një këngë eksplozive? Thjesht mendim me zë, dhe me kë producent të bashkëpunoj? Nuk e kam idenë se kush nga producentët është më në zë tani atje momentalisht, duke qenë se nuk jam fare në rrjedha me industrinë muzikore shqipe. Ҫdo këshillë do të merret parasysh. Ju dua!” – shkruan Linda në Facebook. /revistaclass.al/
