A përdoret fjala pjerdh? Në fjalor është, gjendet edhe në librat me shprehje popullore, vetëm se ne kemi frikë ta pranojmë edhe kur situata nuk ka fjalë tjetër që i shkon më mirë.
Nuk është atletika një sport që lëviz milionat nëpër botë? Madje edhe në Shqipëri ditën e vrapit në orën e fizkulturës nëpër shkolla, vajzave i shfaqej disa herë në muaj cikli, ndërsa djemve i vdiste gjyshja për herë të dhjetë. Nuk ka garë mes një kampioneje atletike dhe një këngëtareje apo futbollisti, pasi kategoritë që garojnë të fundit mbledhin shumë më shumë adhurues, se një sportiste që lufton e vetme në një disiplinë individuale, por nëse në fund sedra matet me kutin e krenarisë në botë, një atlete, futbollist apo edhe këngëtare kupën e ngrënë njëlloj. Nuk ka një Europë për sportet me fansa të çmendur dhe një Europë tjetër për sporte me ndjekës të moderuar. Dhe titulli kampion apo nënkampion njësoj është. Nëse je dirigjent në Koncertin e Vienës apo në saxhion e akademisë, orkestra njësoj ngrihet në këmbë dhe publiku të nderon njëlloj po ashtu.
Nëse ne duam suksesin ta masim me ulërima dhe bori në rrugë, ç’faj ka për këtë nënkampionia e botës për 3.000 metra Luiza Gega?
Le të shpërthejë zhurma e festimet për futbollistë e për këngëtare që rrallë e ndrisin në “Eurosong”, por të mos i hamë hakën Luiza Geges që vetmitare përballon sfidat për të jetuar dashurinë e saj në maksimum, atletikën.
Kryeministri pret analizat antidoping që ta takojë nënkampionen, nuk e di, futbollistëve të Kombëtares a i bëri kush analiza të tilla? Po këngëtarët në skena europiane kanë kënduar të gjithë pa substanca? Analiza për të gjithë, apo…?!
Luizë e dashur të kërkoj ndjesë në emrin tim që zbrite dhe dole nga aeroporti e harruar nga pushtetarët, e përgëzuar nga një dorë njerëzish që nuk di sa të kthjellët nga politika e patën dashurinë ndaj teje dhe nga ata që të hipën në limuzinë për 200 metra, ca foto reklamë për këtë makinë meqë është stinë dasmash dhe të ulën në tokë. Sa turp! Ndjesë dhe përgëzime për emocionet që ndjeve kur të varën në qafë medaljen e vendit të dytë, një emocion që nuk e merr dot, duke ngjeshur lekët e tenderave nëpër valixhe drejt Panamasë…
