“Vogue” interviston artisten: Ju prezantojmë Era Istrefin, këngëtaren eurolindore me zërin si Rihana

Pikërisht ky ishte titulli i artikullit të prestigjiozes “Vogue”, në faqet e të cilës shkruhet një intervistë me këngëtaren kosovare, realizuar gjatë qëndrimit të saj së fundmi në Los Angeles. Në hyrjen e inetrvistës, Era Istrefi përshkruhet si këngëtarja që doli nga hiçi dhe bëri ‘bum’ e tani po shijon në SHBA suksesin marrë nga interneti. “Hit-i i saj ndërkombëtar “Bonbon” që është klikuar më shumë se 133 milionë herë në YouTube, e shndërroi Istrefin në një prej yjeve më në zë të Europës Lindore në vitet e fundit. Sapo kënga nisi të rritet, Istrefi publikoi edhe versionin anglisht të “Bonbon” këtë verë dhe fluturimthi u bë hit. Era Istrefi duket e vendosur në rrugën e saj. Ajo ka firmosur me një nga kompanitë më të rëndësishme të industrisë muzikore Sony Music Entertainment dhe Ultra Music për përfaqësimin në SHBA. Teksa po bën një pushim nga muzika, Istrefi foli për “Vogue.com” për ndjesinë që ke kur shndërrohesh në sensacion brenda natës”, shkruan “Vogue”. Era ka rrëfyer për fillimet e saj si dhe për famën e jashtëzakonshme që mori papritur. “Pashë që ndjekësit e mi po rriteshin me shpejtësi brenda natës, me mijëra në një minutë. Thashë çfarë po ndodh, mos më kanë vjedhur profilin? Më pas pashë postime, shumë postime të këngës time dhe njerëz që tregonin se sa shumë e donin atë. Ishte shokuese por shumë gjë e bukur. Ishte një mrekulli”, ka thënë Era.