Sot në ditëlindjen e kompozitorit Flori Mumajesi, veç urimit të Elvana Gjatës dhe anëtarëve të tjerë të familjes “Threedots”, një urim special për të vjen edhe nga një mikeshë e vjetër, bashkëudhëtare e tij në muzikës. Ndonëse klanet në muzikë, i kanë përçarë edhe artistët, Çiljeta Xhilaga, si gjithmonë e çiltër, i ka kushtuar këtë paragraf emocionues për Florin.
“Këtë djalin këtu, që sot është bërë kaq i madh, e njoh që kur punonim tek “Radio Stinët”… Ti bëje DJ Florin, ndërsa unë prezantoja këngët e vitit, diku 17 vjet më parë… S’besoj se e ke harruar Arqilenë, pronarin. Kujtoj që të kam bërë edhe një kavie dhuratë në ato vite, që nuk jetoi shumë. Si tani i mbaj mend kohët kur vije më ndihmoje në provat e “RinFest”, konkursit që bëhej mes gjimnazeve. Ka dhe sa e sa kujtime të tjera ndër vite, kujtime të një shoqërie të pastër, ku parësore ishte dashuria për mik/un/eshën dhe muzikën, në ndryshim nga tani, ku për shkak të interesave është e vështirë të ekzistojnë shoqëritë mes artistëve. Nuk i harroj orët e gjata në “Radio Energy”, ku gjithmonë vija me çokollata në studio me vete, por edhe me ide të qarta… Kisha menduar klipin, fabulën, veshjet, madje edhe sandalet i kisha zgjedhur, vetëm kënga na mungonte. Kam shumë kujtime të bukura me ty “Piçu”… Shumë pak e dinë që një pjesë e jona dikur të thërriste “piçuu”. Herën e fundit kur isha në studio tek ty, para një muaji, teksa po kopjonim të gjitha këngët e mia ndër vite, të realizuara nga duart e tua të arta më the: “Tani që po i dëgjoj sa këngë kam bërë për ty, po kuptoj që kam punuar me shumë dashuri”… Dhe unë sot, në ditën tënde të lindjes, doja të të falenderoja nga zemra për çdo këngë që ke punuar për mua. Dashuria dhe pasioni për këngën mos t’u shteroftë kurrë! Vitet do të shkojnë, por ti do të mbetesh gjithmonë shoku im i pakohë, sepse shoqëria jonë nuk njeh afat”, – ka shkruar këngëtarja.
