Këtë sezon të ri televiziv, në prezantimin e programit të mëngjesit “Wake-Up” në Top Channel kemi parë sërish një dyshe meshkujsh. E nëse e keni vënë re, dyshet e prezantuesve meshkuj në televizonet shqiptare sa vijnë e po shtohen. Me sa duket kjo rezulton e suksesshme e për këtë arsye drejtuesit, pra autorët ua besojnë moderimin djemve. Sakaq Eno Popi vazhdon të mbetet emri dhe imazhi i pandryshuar i formatit për të cilin po flasim qysh prej ditës së parë të daljes në transmetim, vite më parë. Përkrah tij sivjet qëndron perfekt ish-spikeri i lajmeve i të njëjtit televizion, Isli Islami. Themi ish-spikeri pasi vetë prezantuesi tregon se është shkëputur tanimë nga studiot e informacionit. Në një prononcim për “revistawho.com” Isli Islami tregon se është gjendur mjaft mirë në këtë format të ri. “Emocioni i një programi është shumë ndryshe nga ndjesia e dhënies së lajmeve. Ndikon pak fakti që u bënë 9 vjet që u mora me lajme dhe erdhi koha të përfshihem në një eksperiencë tjetër, të re”, është shprehur ai.
Isli ka gjetur në studio një njeri i cili emocionet e herës së parë i ka kaluar me kohë. I pyetur nga ne se si u gjendën bashkë ai përgjigjet: “Me Enon pati bashkëpunim shumë të natyrshëm, u ndjemë rehat që herën e parë. Mendoj se është e rëndësishme në një program “live”, e u ndjemë mirë rrjedhimisht. Me studion e lajmeve jam ndarë ama sërish do të zgjoheni me fytyrën time. Nuk ju ndahem (qesh)”.
