Një dasmë e pazakontë do të zhvillohet nesër në Tiranë. Nëse shumë persona të pasur dhe të njohur bëjnë të pamundurën që t’i realizojnë sa më privatisht festat e tyre, ka dhe nga ata që nuk e ndiejnë plotësisht gëzimin, pa spektaklin para publikut. Ylli Ndroqi, pronari i Ora News dhe Channel One, si dhe drejtues i disa bizneseve, ka dashur ta organizojë dasmën e djalit të tij të madh në sallën e Pallatit të Kongreseve. Dhe dëshirat e njerëzve të pasur, zakonisht realizohen, shkruan “Class”. Një tendë është ngritur dje para Pallatit të Kongreseve për celebrimin e Redonit dhe partneres armene. Celebrimi do të zhvillohet të shtunën paradite. Ndërkaq festimet kanë nisur mbrëmë në Hotel Tirana, ku shihet që nusja ka zgjedhur një fustan të bardhë me ornamente lulesh, ndërsa dhëndri është vetëm me këmishë. Ylli Ndroqi ka zgjedhur një kostum ngjyrë vere syrah, ndërsa bashkëshortja e tij, Mimoza, një fustan të ëmbël rozë me qendisma lule shege. Në festë shihen edhe disa figura të ekranit, si Anjeza Maja, Mira Kazhani, Gerti Carcani… Sot, familja do të pushojë për të nisur nesër një ditë të gjatë, me celebrimin e më pas darkën në hollin e Pallatit të Kongreseve. Ndroqi ka dy djem, Redonin dhe Yldonin, por ky është gëzimi i parë i madh për familjen e biznesmenit.
