Rrjetet sociale janë një nga mënyrat më të mira për të hedhur mesazhe në adresë të shumë personave. Kjo është rruga e preferuar e personazheve publike, të cilët, me anë të një fjalie të shkruar ndërmjet komenteve, japin mesazhe të ndryshme kundrejt masave të ndjekëse. Moderatorja dhe gazetarja e “SuperSport”, Ilda Bejleri, ka postuar një foto në rrjetin social “Instagram” duke shkruar: “Sapo i thash PO KOSOVËS”, ka shkruar moderatorja, ndërkohë që ka postuar një foto nën logon e “Super Sport Kosovës”. Një ndër komentuesit ka qenë pikërisht Milot Rashica. Mesfushori i Viteshes, i cili la Kombëtaren shqiptare për atë të Kosovës, pak javë më parë, ka ngacmuar gazetaren dhe në të njëjtën kohë ka ironizuar atë pjesë të opinionit sportiv në Shqipëri që e cilësoi si tradhti largimin nga Shqipëria. “Tradhtare”, ka shkruar mesfushori në koment për foton dhe diçiturën e hedhur nga Ilda Bejleri. Nuk ka vonuar përgjigjja e kësaj të fundit: “Hahaha ky fat na ra”. Rashica e justifikoi largimin me mungesën e hapësirës te Shqipëria dhe me faktin që te Kosova do të kishte më shumë mundësi për të luajtur. /Panorama
