Baza e makijazhit është toni i fytyrës, ndaj është shumë e rëndësishme të dimë si të zgjedhim të duhurën dhe si ta aplikojmë atë.
Gjëja e parë më e rëndësishme është tipi i fytyrës.
Fytyrat e yndyrshme kërkojnë ton fytyre të anuar nga tonet mat. Ky lloj toni ndihmon në thithjen e yndyrës së tepërme të fytyrës dhe bashkuar me tipin tuaj të fytyrës jep përshtypjen e një fytyre të shëndetshme. Nëse do tentoni të vendosni ton me pak shkëlqim ose vajra të ndryshëm, shanset janë që të mos qëndrojë më shumë se 1 ose 2 orë në fytyrën tuaj dhe nuk do ndiheni komode me ndjesinë që ju jep.
Fytyrat e thata kërkojnë ton fytyre të anuar nga tonet me më shumë përqindje hidratanti. Toni i tillë ndihmon lëkurën tuaj në hidratimin e saj dhe nuk lejon për disa orë të ditës që fytyra juaj të duket e thatë dhe ndonjëherë e rrjepur.
Fytyrat e miksuara mund t’i përdorin të dyja, por sipas mendimit tim, janë llojet e fytyrave më të vështira për t’u përshtatur me tone të ndryshme. Ka të bëjë formula e tonit, konsistenca se sa mat dhe sa hidratant është dhe sa e yndyrshme ose e thatë është fytyra juaj në zona të ndryshme.
Një tjetër kriter i rëndësishëm në zgjedhjen e tonit është dhe përshtatja me ngjyrën e trupit tuaj. Nuk mund të hamendësosh nëse një ton fytyre përshtatet ose jo me tipin dhe ngjyrën e fytyrës tuaj.
Ekzistojnë 2 lloje ngjyrash në tonin e fytyrës që më pas vazhdojnë në tonalitete të ndryshme. E para është me bazë rozë dhe e dyta është me bazë të verdhë. Kjo është zgjedhja e parë që duhet të bëni duke parë se në çfarë ngjyre anon fytyra juaj. Më pas, për të gjetur tonalitetin e duhur, merrni një sasi shumë të vogël nga toni që keni zgjedhur dhe vendoseni në qafë. Fytyra jonë nuk ka vetëm një ngjyrë por është e miksuar, ndaj toni i përshtatshëm për ju duhet të provohet gjithmonë në qafën tuaj.
Si të vendosni tonin?
Mjaftojnë vetëm 2 mjete. E para, një furçë të madhësisë dhe formës që dëshironi (mund të shikoni tek video çfarë preferoj unë). Dy shtypje të tonit mund të mjaftojnë për fytyrën. Nëse doni mbulim më të madh mund ta shtoni pasi të keni mbaruar të gjithë fytyrën me shtresën e parë. Më pas për ta vendosur më mirë në fytyrë dhe për të hequr aksesin e tepërt të tonit, përdorim një sfungjer (Beauty Blender) të lagur. Shumë prej njerzëve që kam biseduar për këtë temë, nuk kuptonin ndryshimin pas përdorimit të këtij sfungjeri sepse nuk e lagnin më përpara. Mjafton ta vendosni tek lavamani dhe më pas me një pecetë ose peshqir të largoni aksesin e tepërt të ujit, pastaj mund ta përdorni .
Pasi keni vendosur tonin e fytyrës, e rëndësishme është që dhe ta fiksoni atë, në mënyrë që të mos ju transferohet nëpër rroba dhe të mos keni atë ndjesinë e kremit. Merrni një pudër (mund të jetë pa ngjyrë ose me ngjyrën e tonit tuaj) dhe një furçë relativisht të madhe për ta hapur në të gjithë fytyrën.
Disa nga tonet e mia të preferuara:
Faleminderit që më lexuat! Sara
