Lidhja në martesë midis një 14-vjeçari dhe një 13-vjeçareje ishte lajmi më me rëndësi i ditës së sotme. Një video e pazakontë u shpërnda në rrjetet sociale në të cilën shihej një çift i ri duke u martuar. Adoleshentët nga Malisheva tërhoqën padyshim vëmendjen, por nuk munguan as kritikat e shumta. Mosha e dy të sapomartuarve përbën një shkelje sipas Kodit Penal të Kosovës, në të cilin parashikohet se në raste të tilla prindërit mund të dënohen nga 5 deri në 20 vite burg. Për komentues të tjerë, një gjë e tillë nuk është aspak e çuditshme pasi zona në të cilën është regjistruar ngjarja, dallohet për mbështetje të fortë të rregullave kanunore. Ndërsa sipas psikologes Albana Demiri një gjë e tillë është e pashëndetshme, është e rrezikshme që kjo fazë e rëndësishme e zhvillimit të llojë me martesë. “Si pasojë e mos informimit, mos edukimit të mirë lltë nga ana e prindërve, psikologëve që nuk kemi askund, mësueseve, ata nuk arrijnë as ta njohin veten e tyre dhe ta duan atë, dhe jo më tjetrin me të cilin kanë vendosur të martohen. Ata nuk fajësohen sepse jetojnë me ëndrrat e tyre të keqthurura që ua ngacmojnë trurin dhe zemrën. Për ata kështu është e drejtë, sepse nuk e dinë se çfarë po ndodh me ta. Këtu fajësohet familja dhe rrethi ku jetojnë.”-përfundon Demiri për “Lajmi.net”.
