“Black Moon”, mund të tingëllojë si një term misterioz apo si një titull apokaliptik filmi, por në fakt është një ngjarje astronomike që nuk ka lidhje me fundin e botës, pavarësisht shqetësimeve dhe abuzimeve se po vjen dita e katastrofës.
“Black Moon” ose Hëna e Zezë nuk është një term shumë i njohur për botën e astronomisë. Por vitet e fundit, termi është bërë më popullor nga astrologët e besimit Wiccan (besim pagan).
Ky fenomen i rrallë do të ndodhë mbrëmjen e së premtes, 30 shtator, duke u gdhirë e shtuna, por çfarë është saktësisht ngjarja hënore, pakkush e di. A do të mund ta shohim ngjarjen e rrallë?
Çfarë është Hëna e Zezë?
Që nga Hëna e Gjakut, deri tek Hëna Blu apo lloj-lloj emërtimesh që i janë vendosur fenomeneve të ndryshme të Hënës, në varësi të ndryshimeve të saj, “Black Moon” është një term më i rrallë dhe ka një kuptim krejt tjetër për satelitin natyror të Tokës.
Interpretimet e ekspertëve janë nga më të ndryshmet për Hënën e Zezë, megjithatë ka disa përkufizime për atë që ndodh në realitet. Shumica e ekspertëve pajtohen me mendimin se Hëna e Zezë i referohet Hënës së dytë të re brenda një muaji kalendarik. Hëna e Zezë nuk duhet ngatërruar në Hënën Blu. Kjo e fundit ndodh kur brenda një muaji ndodh dy herë Hëna e plotë.
Joe Rao, përfaqësues i space.com, shpjegon: “Hëna e dytë e plotë brenda një muaji kalendarik është quajtur ndryshe Hëna Blu, ndërsa Hëna e Zezë supozohet të jetë ana tjetër e Hënës Blu, pra Hëna e dytë e re brenda muajit një muaji kalendarik…”
Sipas astronomisë, Hëna e re ndodh atëherë kur ana e errët e Hënës është përballë Tokës, ndaj edhe duket sikur nata është pa Hënë. Natyrisht, ajo është, por e fshehur, plotësisht në hije. Në këtë moment Hëna është në mes të Tokës dhe Diellit, por pjesa e saj e ndriçuar nuk shfaqet para nesh. Krejt e kundërta e Hënës së Re është Hëna e Plotë, kur pjesa e saj e ndriçuar është përballë Tokës.
Hëna e Zezë e fundit ka qenë ajo e marsit 2014, ndërsa tjetra që do të vijë është pas tre vjetësh, në vitin 2019./RevistaClass
