Ai e ka vërtetuar se është një nga artistët e estradës shqiptare që flet hapur dhe pa doreza. Përveç muzikës është shumë aktiv edhe në rrjetet sociale, atje ku ndan çdo ditë me ndjekësit momente nga përditshmëria.
Endri Prifti, në një intervistë për “Panorama” ka folur për planet muzikore, pjesëmarrjen në festivalet e fundvitit, dashurinë dhe veset e këqija. Dy këngë të reja priten të prezantohen nga ai së shpejti. Një për “Këngën Magjike” dhe një për Festivalin e Këngës në RTSH. “Është vepër e shkëlqyer që gjithmonë do të mbetet e përjetshme dhe do të kërcehet edhe nga shumë breza që do të vijnë. Teksti flet për dashurinë, një këngë ritmike që do e dëgjoni dhe do të kërceni”, ka thënë ai për këngën me të cilën do të prezantohet bashkë me Stefin këtë vit tek “Kënga Magjika”. Veçantia e saj qëndron në tekst, të cilin e ka shkruar bashkëshortja e ndjerë e Stefit.
Duke kaluar në dashuri, Endri nuk ka dashur të flasë për dy martesat që ka lënë mbrapa krahëve. Ka dashur vetëm të përcjellë mesazhin se dashuria e vërtetë ekziston dhe se ai është në kërkim të saj. “Patjetër që do gjej dashurinë e vërtetë, sepse gjëja më e bukur për mua është dashuria e vërtetë”, thotë Endri.
E përsa i përket veseve të këqija, ai ka treguar se kohë më parë ishte i varur nga një i tillë. “Kam luajtur jo për të fituar, por për të tërhequr vëmendjen dhe më pas kuptova se e dëmtoi shumë ekonominë time. Kryesorja është që tani kjo është një e kaluar”, ka thënë Endri për bixhozin.
Megjithatë këngëtari e ka kaluar këtë periudhë të errët të jetës së tij dhe tregon se tashmë nëse do e shohim në një kazino brenda apo jashtë vendit, ai do të jetë duke luajtur për qejf mes miqsh, pa shpenzuar shuma të dëmshme për ekonominë e tij. / RevistaClass.Al
