Ai është 19 vjeç, e nëse i thua një fjalë, ai mund ta kthejë në një këngë. Quhet Ani Hasanas dhe të shtunën në mbrëmje u shpall fituesi i “Free Style Show”. Ky është një konkurs i organizuar nga Radio MCN, që nisi muaj më parë. Të rinj nga e gjithë Shqipëria që janë të apasionuar me muzikën hip-hop dhe që kanë talent për të krijuar e kënduar në këtë zhanër, morën pjesë në konkurs dhe shpalosën talentin e tyre përmes mikrofonit të radios. Radio MCN transmeton kryesisht muzikë hip- hop dhe RNB, duke qenë se bashkëthemelues dhe drejtor artistik i saj është reperi i njohur Geri Xhari, që në Shqipëri është i famshëm si Big Basta. Aty u krijua një hapësirë e posaçme për talentet e reja, të cilët u vendosën në garë me njëri-tjetrin përpara dëgjuesve që votuan me mesazhe, dhe një jurie djemsh, njohës të mirë të hip-hopit. Fituesi siguroi realizimin e një këngë dhe videoklipi të sponzorizuar nga MCN, si dhe distribucionin nga studio e famshme “360M RECORDS”, duke marrë kështu ndihmën profesionale për të hedhur hapat e parë të sigurtë për një karrierë të mirfilltë në muzikë. Finalja u transmetua mbrëmë ‘live’ në radion MCN, 103.1. Të ftuar ishin MC Doza, G UP dhe Addictive, të njohur në komunitetin e reperave, me Sid Tarifën në mikrofon dhe DJ Enkin në pultin e transmetimit. Burime nga stafi bëjnë me dije se shumë shpejt po përgatiten për një edicion të dytë dhe ftojnë të rinj nga e gjithë Shqipëria që dinë të bëjnë rrep, të marrin pjesë. Më poshtë mund të shikoni foton dhe videon nga finalja e “Free Style Show”.
