Shumë trajnerë ua ndalojnë futbollistëve seksin para ndeshjeve, me argumentin se u shter energji të nevojshme. Madje ka prej tyre që besojnë se seksi është shkaku i nivelit të dobët të një kampionati të tërë. Kështu mendon Malik Xhabir, ishfutbollist ganez, aktualisht trajner i ekipit Asante Kotoko. “Shumë lojtarë nuk rezistojnë dot 90 minuta, sepse janë të lodhur që më parë. Dhe e dini pse? Nuk flenë mjaftueshëm dhe nuk stërviten siç duhet, pasi bëjnë shumë seks”, është shprehur 71-vjeçari për mediat vendase. Sipas ishsulmuesit të kombëtares ganeze në vitet ’60’70, nëse kjo situatë vazhdon, Premier Liga vendase nuk ka për t’u përmirësuar kurrë, shkruan “Panorama”. “Ka një kohë të caktuar për seks dhe një tjetër për futboll. Por nëse këto të dyja ngatërrohen, nuk mund të arrish kurrë në majë”, theksoi trajneri. Megjithatë, nuk dihet me siguri nëse futbollistët do t’ua vënë veshin këtyre fjalëve…
