Është padyshim një nga bombat e skenës shqiptare. Energjike, e bukur dhe një prej këngëtareve më të mira të skenës sonë. E kemi fjalën për Soni Malaj, vajzën brune që ka marrë zemrat e mijëra fansave me performancat e saj që në fillimet e karrierës. Soni zbuloi pasionin e saj për muzikën që në fëmijëri, duke u berë kështu pjesë e festivaleve për fëmijë në Tropojë, nga ku u vlerësua me çmime të para dhe të dyta. Kur ishte vetëm një adoleshente, ajo u bë pjesë e grupit ‘Spirit Voice’ me dy mikeshat e saj të tjera Elia Zaharia dhe Dorina Tiko, deri në shpërbërjen e tij.
Pavarësisht kësaj, Soni e vijoi karrierën e saj në muzikë me projekte solistike. Këngë e klipe si ‘Lajkat u shndërruan shumë shpejt në një çelës suksesi për karrierën e këngëtares, e cila publikoi në ato vite edhe albumin e saj të parë ‘Nuk qaj për ty’. E kështu ajo u bë padiskutim një nga këngëtaret më të afirmuara në skenën shqiptare. Disa nga këngët e Sonit që i kanë rezistuar kohës dhe këndohen akoma sot janë: ‘Një me dy’, ‘E vogla’, ‘Ndarja’ (hiti që u bë refren i shumë çifteve), dueti me Flori Mumajesin ‘Fluturimi 3470’ (pjesëmarrës në Kënga Magjike 2007, ku fituan vendin e dytë), baladat tepër të ndjera ‘Të dua ty’, ‘Ndarja’, ‘Shpirti im binjak’, ‘Zemër pakurdisur’, etj.
Në ‘Top Fest 11’, pjesëmarrëse me hitin ‘Me të jeton’ ajo u kurorëzua me çmimin e parë. Soni Malaj përveç albumeve dhe koncerteve të shumta në të gjithë botën që kanë vazhduar intensivisht, ka shpalosur talentin e saj dhe në musical-in ‘Chikago’ në rolin e Velma Kelit. Listës së aktiviteteve të saj i shtohet po ashtu roli i prezantueses së festivalit të madh në RTSH në vitin 2005, apo pjesëmarrja në spektalin ‘Dancing With The Stars’, spektakël në të cilin Soni shfaqi aftësitë e saj edhe si kërcimtare.
Gjithashtu pas kthimit nga Spanja, Soni Malaj u angazhuar si trajnere dhe anëtare jurie në talent show-n “X Factor Albania”. Ajo vazhdon të prodhojë hite të ndryshme, duke qenë kështu një nga këngëtaret më të preferuara të publikut shqiptar e më gjerë. Disa nga prodhimet e saj të fundit janë: ‘Tulipan i bardhë’, ‘Me rrena’, ‘Me mua’, ‘Ti, jeta’ si dhe ‘Për vete më mbaj’, me të cilën konkurron në ‘Kënga Magjike’. Në fotot që pasojnë ‘revistawho.com‘ sjell imazhin e Sonit në këto vite karrierë.
