DIVORC NE KRUJE/ Gruaja kthehet te prindërit, vëllai bashkë me burrin e zhdëpin në dru

Kërkesa e një gruaje, nënë e një fëmijë te vogël për t’u divorcuar nga burri i ka kushtuar një dajak të mirë asaj, nga bashkëshorti dhe nga vëllai i saj, pas kundërshtimit për t’u bashkuar prapë me të. Ngjarja ka ndodhur në Krujë një ditë më parë dhe pas denoncimit policia ka arrestuar një nga dhunuesit dhe ka shpallur tjetrin në kërkim. Policia bën me dije se ka arrestuar shtetasin Besnik (Abedin) Tema 40 vjeç, banues në Krujë, vëllai i denoncueses. Gjithashtu është shpallur në kërkim dhe po punohet për kapjen e shtetasit I.K. 32 vjeç, banues në Tiranë, bashkëshorti i denoncueses. “Shtetasit e mësipërm, më datë 08.12.2016, në Borizanë Krujë, kanë ushtruar dhunë fizike, ndaj shtetases F.K. 25 vjeçe. F.K. ka marëdhënie familjare me autorët, përkatësisht Besnik Tema është vëllai i saj, ndërsa I.K. është bashkëshorti”­ njofton policia. Sipas dëshmisë, gruaja ishte larguar nga banesa e burrit dhe kishte shkuar te prindërit. Ajo kishte vendosur të ndahej, por duket se burri nuk e pranonte divorcin. Ditën e djeshme, ai shkoi te banesa e vjehrrit, ku ishte edhe gruaja dhe ka tentuar të qetësonte situatën, t’i mbushte mendjen e të bashkoheshin sërish, raporton “Panorama”. Në bisedë është bashkuar edhe vëllai i gruas. Por, duket se në debat e sipër gjërat janë acaruar dhe pasi nuk i kanë mbushur mendjen gruas të bashkohej, ata të dy e kanë dhunuar. Materialet i kaluan Prokurorisë së Rrethit Gjyqësor Krujë për veprime të mëtejshme për veprën penale”Dhunë në familje”parashikuar në nenin 130/a të Kodit Penal.