Ai ishte një nga artistët e rinj më të pëlqyer e duartrokitur të Këngës Magjike. Bëhet fjalë për Flori Nazifin, i cili i ka kënduar zotit gjithmonë e ishte në atë spektakël porsi një bekim. Të shumtë ishin ata që gjetën veten në interpretimin e tij të ndjerë dhe zërin fantastik, që emocionoi këdo që e dëgjoi. Për një këngë kaq të suksesshme është rrëfyer vetë autori i këngës, Alban Kondi për gazetën Panorama.
Kënga jote “Mos ik” u bë hit, edhe pse në garën e konkurrentëve të rinj. E prisje këtë sukses?
Jam shumë i lumtur për suksesin e produksionit dhe të Flor Nazifit. Ndjesia e këngës më jepte emocion, zëri i Florit një zë brilant.
Si u ndjeve? Të them të drejtën nuk dija si do ta priste publiku këtë këngë. Tani që është pëlqyer, ndihem shumë, shumë i lumtur.
Kujt i thua “Mos ik” me këtë krijim? Të gjithë atyre njerëzve që dua.
Ka pasur hamendësime se kjo këngë është një dedikim i pastër për Dr. Florin. Është e vërtetë?
Për momentin ndodhem jashtë Shqipërisë dhe nuk dua të flas pa qenë prezent nga afër. Sepse nuk dua të ketë aludime të paqena.
Kur e shkrove këtë këngë, sa kohë ka? S’di të them datë fikse, por ka mbi një vit, në mos gaboj, apo ndoshta pak më shumë.
Si lindi bashkëpunimi? Jeni njohur në kishën që frekuentoni me Flori Nazifin?
Jo, e kam parë për herë të parë në spektaklin “Albania got talent” dhe jemi ritakuar pas shumë vitesh në kishë, por jo rastësisht. Unë kisha humbur çdo kontakt me të, dhe u ritakuam nëpërmjet pastorit të kishës “Rilindja”, Fitor Muçës. Dhe aty vendosëm të fillojmë të punojmë bashkë në muzikë.
Ky bashkëpunim do të jetë i pari dhe i fundit, apo keni plane bashkë? Mund t’ju them tani se ky është vetëm fillimi.
