Diamante dhe dashuri, një nga serialet turk më të ndjekur për shkak të tematikës së veçantë ku roli kryesor me emrin Elif, rrëmbeu zemrat e teleshikuesve me karakterin e saj. Ata që e kanë ndjekur serialin e njohin shumë mirë Elifin, një vajzë kokëfortë, e vendosur për të shpëtuar familjen e saj. Pas vdekjes së babait, disa persona i kërkojnë diamantet që babai i saj kishte borxh duke e futur Elifin në botën e pastrimit të parave. Këtu ajo njihet edhe me komisar Omerin me të cilin dashurohet. Seriali përfundoi me një fund të lumtur dhe aktorët ende mbeten të preferuarit e teleshikuesve, sidomos Elifi. Por pas përfundimit të serialit, aktorja Tuba Buyukustun, e njohur si Elif, bëri një ndryshim në pamjen e saj duke i prerë flokët shkurt. Në një deklaratë aktorja tha se i preu flokët sepse kishte vendosur t’ja dhuronte fëmijëve të sëmurë me kancer. Edhe sot Tuba mban të njëjtin look me flokë të shkurtra. Aktualisht ajo po luan përkrah aktorit Kivanç Tatlitug në serialin “Cesur ve Güzel”.
