Kristi Becka ishte miku më i mirë i Tea Zhulit në orvatjet plot ngacmime të saj mes Vesel Kurtishajt dhe Fisnik Veisllarit brenda shtëpisë së “Big Brother”. Dy rivalët e “BB 8” tani rishfaqen në skenën publike si të dashur, duke hedhur pas krahëve bëmat e njëri-tjetrit me persona të tjera. Kristi dhe Tea janë të dy nga Korça, dhe e kanë nisur 2017 me deklarata të forta dashurie karshi njëri-tjetrit. Pasi kanë gjetur veten profesionalisht në Tiranë, Tea si modele e stiliste, ndërsa Kristi si ekspert futbolli në emisionin“Bar Skedina” me Ilda Bejlerin, duket se kanë gjetur gjuhën e përbashkët edhe në dashuri, për të nisur një lidhje të fortë mes tyre. “Nuk dua të jap shumë detaje se është diçka private, por rëndësi ka që unë dhe Tea çift jemi më të lumtur se kurrë”, tha Kristi për gazetën “Panorama”.
Nuk dihet se kur ka nisur ekzaktësisht kjo lidhje, por ajo që komentohet nga miqtë e afërt të çiftit është se Tea ka gjetur dashurinë e vërtetë 1 vit pas zhgënjimit nga djali nga Kosova, Vesel Kurtishaj. Tea dhe Veseli u ndanë me sherr pas dy muajsh bashkëjetesë në vjeshtën e 2015, ndarje që sipas komentuesve u pasua nga ribashkime të shkurtra, fakt ky që nuk u pranua nga ata të dy. Ndërkohë që për Kristin ajo është më shumë se e dashur, pasi ai e ka prezantuar edhe me familjen, siç duket në fotot që poston ai me Tean dhe vëllain e tij. Ata janë një nga çiftet më të reja të showbizit shqiptar, e duke qenë në fillimet e lidhjes, kurioziteti është i madh për të më suar më shumë rreth tyre. Postimet në rrjetet sociale nga dy ishkonkurrentët e “Big Brother” nuk mungojnë, pasi përmes fotove dhe videove, Tea Zhuli dhe Kristi Becka shprehin me gjeste e dedikime sa të dashuruar janë. “Deri në pafundësi e më tej”, shkruan Tea, krahas fotos së publikuar nga i dashuri i saj, ku ai e mban Tean mbi shpinë. Ndryshe nga lidhja me Veselin që dukej më e fshehtë dhe romantike, lidhja me Kristin duket më argëtuese dhe e hapur, ashtu siç është dhe natyra e tij. Le të shohim nëse çifti do të evolojnë në marrëdhënien e tyre për ta zyrtarizuar lidhjen me fejesë apo martesë.
